真實案例:當媽媽情緒不穩,孩子的安全感如何重建
發布日期:2024年7月30日
個案背景
小朋友A,5歲,嚟到治療室嘅時候,媽媽已經被診斷有燥鬱症。媽媽嘅情緒時高時低——有時好溫柔、好有愛,攬住小朋友又錫又氹;有時好低落,完全唔想講嘢,甚至會突然發脾氣。小朋友A完全無法預測媽媽下一秒會點,慢慢變成一個安全感極低嘅孩子。
喺學校,小朋友A情緒穩定,但係十分安靜,好少同人交流接觸。上堂坐定定,但從未參與。
治療過程
1第一階段:建立安全感
頭幾節,小朋友A完全唔敢玩。佢成日望住門口,驚媽媽會突然衝入嚟。每次攞起玩具,都會望吓治療師嘅反應——好似好怕做錯嘢,好驚被人鬧。治療師只係靜靜坐喺度,等佢——冇要求、冇催促。
慢慢,小朋友A開始攞起一啲玩具,但每次有少少聲,都會成個彈起。治療師每次都溫和咁講:「我喺度,呢度好安全。」
2第二階段:用遊戲表達
第6節左右,小朋友A開始用公仔玩一個重複嘅場景:一個 BB 公仔成日喊,但周圍嘅大人成日走嚟走去,冇人理佢。
治療師輕輕問:「BB 喊緊,但冇人聽到?」 小朋友A停低,望住治療師,然後細細聲講:「係。」
治療師再問:「呢種感覺,係咪有啲驚?」 小朋友望住治療師,答:「係。」
呢個係佢第一次用言語表達自己嘅感受——「我好驚」。
3第三階段:家長同步輔導
同一時間,治療師同 mommy定期見面。 mommy 好內疚,覺得自己嘅病連累咗個仔。治療師陪佢一齊睇返:
- 點樣喺情緒穩定嘅時候,同小朋友建立「安全嘅時間」
- 點樣同小朋友解釋「 mommy 病咗,唔係你嘅錯」
- 點樣喺自己情緒差嘅時候,俾小朋友一個簡單嘅「預告」
轉變
經過大約 20節遊戲治療 同 8節家長輔導:
小朋友A喺學校雖然仍然安靜,但開始有少量眼神接觸,甚至試過一次主動遞嘢俾同學
佢開始識得用說話講:「我今日有啲緊張」或者「我想 mommy陪我耐啲」
mommy 學識咗喺自己情緒差嘅時候,同小朋友講:「 mommy 收緊,但我仍然愛你」
治療師的話
呢個小朋友教識我:即使環境再不穩,只要有一個穩定、安全、可預測嘅關係,孩子就可以慢慢重建內心嘅安全感。
而 mommy 嘅勇氣,亦係治療入面好重要嘅一部分——願意面對自己嘅困難,願意為仔仔學習新嘅相處方式。
如果你都有類似嘅擔心
如果你屋企都有類似情況,或者你擔心自己嘅情緒影響緊小朋友,唔使自責——尋求幫助,就係愛嘅表現。